ITOITZ SOS!!!

|  Ekologia  | Erresistentzia Globala  |

Indymedia Euskal Herria / Itoizko Solidarioak , 26.09.2003 19:33

cartel de la mani

ARTOZKI BIZIKO BADA
BERTZELAKO MUNDUA NAHI DUGU, BAINA HORI EZ DIGUTE OPARITAN EMANEN ZUEN

(2003/09/15) Irati bailarako (Nafarroa) beste bi herri, Artozki eta Muniain, Itoizko urtegiaren mehatxupean desagertzeko zorian daude. Artozkiko bizilagunek gaur, irailak 15, zuten euren etxeak uzteko azken eguna. Goizean goiz, agerian gelditu da auzokideen amorrua eta ezintasuna eta bi etxe sutan ikusi ditugu. Zenbait auzokidek herrian gelditzea erabaki dute. Agintariek edozein unetan eman dezakete herria erabat eraisteko agindua.

Itoizko Solidarioak taldeak elkartasuna adierazi nahi die Artozkiko herritarrei, eta dei egiten du jendea hara joan dadin, herriaren txikizioa eragozteko. Itoizko Solidarioek tinko eutsiko diote eta azken muturreraino eramango dute erresistentzia, lehenago Itoitz herrian egin zuten moduan.

Itoitz herria 2003/06/16an hustu eta eraitsi zuten. Solidarioek nabarmen atzeratu zituzten txikizio lanak: hiru egun eman zituzten etxeetan itxita, erresistentzian.

Bart, (2003/09/15) Artozkin argindarra moztu dute.

Etxeak uzteko unea heldu bada ere, Nafar Gobernuaren aginduari muzin egin dion jende multzoa dago Artozkin berta. Nahiz eta argia moztu dute, txistorra jaten pasa zuten iluntzean herri honetan bildutako lagunek. Jendea Artozkira joateko gonbitea egin dute bertatik.
(...)

::: hirugarren eguna :::

(17/09/2003)

Artozkik zutik jarraitzen du. Irati bailarako herri hori eraitsi egin nahi dute, lehenago Itoitzekin egin zuten moduan, urtegia bete ahal izateko. Artozkiko bizilagunek malko artean utzi zituzten etxeak astelehenean, irailaren 15ean, baina herria ez dago hilik. Itoizko Solidarioen deiari erantzunez, ehun bat lagun agertu dira herrian, luzaroan erresistitzeko asmoz. Asteburuan kanpaldia eta hainbat ekitaldi egingo dira.

Gaur ere ez da hondeamakinaik agertu. Herriak hustutzeko epea duela hiru egun amaitu bazen ere, Artozkik eta Muniainek zutik diraute. Zutik eta bizirik, jendea jo eta ke ari baita lanean herriak eta baratzeak txukun mantentzeko. Sukaldea, komunak, garbiketarako gunea... Hainbat gune prestatu dira, egonaldia luzea izan daitekeelako. Gaur zaborra biltzera joan dira, Itoizko Solidarioen deiari esker. Beste helburuetako bat posta zerbitzuari eustea da. Horregatik, komeni da herriko etxeetara gutunak igortzea: Juanazuri, Arrotxa, Isidro, Eskola Etxea edo Apezetxea (Artozki 31439-Nafarroa).

Artozki ez dago okupatuta: herriko etxeak bertako bizilagunenak dira. Itoizko Solidarioen helburua herriaren eraispena eragoztea da, bizilagunek herrian bizitzen jarraitzeko aukera izan dezaten.

Astebururako kanpaldia eta hainbat ekitaldi antolatu dituzte Itoizko Solidarioek. Inguruan ez dabil polizía askorik eta oraingoz ez dago arazorik Artozkiraino errepidez iristeko. Garrantzizko oharra kanpotarrentzat: Itoitz pasata, gurutzebidean eskuineko bidea hartu behar da Artozkira joateko. Kartelean jartzen du errepidea obrengatik moztuta dagoela, baina ez egin kasurik. Hori da hartu beharreko errepidea. Kanpin-denda, lo-zakua eta janaria ekartzea komeni da.

::: Laugarren eguna :::

(18/09/2003)

Gaur,goizeko 11-etan Itoizko solidariook prentsaurreko bat eskeini dugu Artozki herrian, erresistentziaren 4. egunean.

Bertan, gure taldekideez gain, Artozkiko bizilagun batek parte hartu du. Prentsaurrekoaren bitartean tentsio uneak bizi izan dira, foruzainen helikoptero bat denbora luzez herriaren gainean egon delako bideo irudiak hartzen

Auzokideak, herriaren gainean udan zehar iragarritako heriotz zigorra oso bizipen traumatikoa izan dela salatu du, ibarreko beste hainbat herrirekin (Nagore, Orbaitz, Itoitz, ...) gertatu dena kontuan hartuz.

Sentsazio hori are traumatikoagoa izan da araneko herrietako biztanle gehienak oso zaharrak direlako. Hauek bizitza osoa bertan eman ondoren korrika eta presaka botata izan dira, jakin gabe urtegia noizbait beteko denentz.

Auzokideek bizitako unerik gogorrenetako bat familiartekoen gorpuen dehilobiratzea izan da, hilobien profanazioa deitu dena.

Auzokideak ere udan zehar foruzain eta guardia zibilen partetik pairatutako presio eta jazarpena salatu ditu, hala herrian nola inguruetan, menditik zaintza lanak egin dituztelako.

Baita Nafar Gobernuaren egosgogorkeria salatu da,auzokideekin hitz egiteari uko egin diolako.UPN alderdiari izenez aldatzea aholkatu zaio: Nafar herri Batasuna izan ordez, nafar herrien suntsitzaileen alderdia beharko luke.

Itoizko Elkartasun Taldeak erresistentzia 4 egun hauek oso positiboki baloratu ditu, garaipen gisa, gure presentziak Artozkin iragarritako suntsipena ekidin duelako. Ironikoki Nafar Gobernua zoriondu dugu, kanporatzearen epea duela 4 egun bete zelako eta agertu ez direnez ba liteke herrien suntsiketa politika okerraz eta urtegia betetzearen ankasartzeaz agian ohartu direlako.

Gure taldeak Itoizko urtegiaren aurkako jende orori dei egiten dio bertara dadin , herriaren suntsiketa galarazteko erresistentzia indar dezagun. Azpiegitura eta etxeen defentsa hobetzen ari da eta zerbitzuak ( posta, zabor bilketa etabar...) mantentzen dira. Asteburuari begira jendeari aholkatzen zaio oihal etxeak eta janaria ekartzeko jende aunitzen etorrera espero dugulako eta bestaldetik , auzokideak euren etxeetara itzuliko direlako.

Asteburuko ekitaldien egitaraua honako hau da:

Ostirala 19,arratsalde-gauean:
Antzerki saioa eta rock kontzertua.

Larunbata 20,arratsaldean:
Itoizko urtegia eta oposizioaren inguruko hitzaldi-eztabaida.
Itoizko erresistentziari buruzko argazki erakusketa.
Festibala, Agoizko taldeen eskutik. Fanfarreak,joaldunak, gaita joleak, trikitilariak,....

Igandea 21, goizean: Pilota partidak
Urtegien eraikuntzak pirineotako herrietan sortutako despopulazioari buruzko mahaingurua. Pedro Arrojo, Janovas, Santaliestra eta beste urtegitako kaltetuei gonbita luzatuko zaie.
Kalderete txapelketa.

::: Bosgarren eguna :::

(19/09/2003)

POLIZIA ARTOZKIN

Goizeko 9:30tan Foru Zaingoen istiluen kontrako taldeetako lau furgoneta Artozki herrian sartu dira. Itoizko Solidarioak herria babesten ari dira Itoizko urtegia eraiki ez dezaten. Pasa den astelehenean herriko etxeen hustutze eta eraisketa hasteko epe legala hasi zen.

Erabateko hustutzearen hasiera zirudiena alarma faltsua bihurtu da. Poliziaren arabera Iberdrolaren langileei laguntzeko joan dira, hauek argi indarra moztu behar zutelako. Dena den, zenbait etxeetan sartzeko erabili dute eta horrela, defentsa sistema aztertzeko. Guardia Zibilaren bi patrol haien laguntzan etorri dira ere. Erresistentzian parte hartzen duten zenbait lagunek teilatuetara igo dira, gainontzekoak plazara eraman dituztelarik.

Foru Zaingoa eta Guardia zibilaren jokabidea zakarra izan da. Etxe gehienetan sartu dira eta, haietako batean mazoaz apurtu dituzte babes atalagak.

Kalean zegoen jendea jo eta bultzatu dute eta Solidarioen bitartekari bat kolpatu ere.

Kale batean bi lagun 400 kilo hormigoi zituen bidoi batera kateatu dira, horrela poliziaren sarrera eragozteko. Foru Zaingoek kateatutako bat jo eta bidoia mugitu dute furgoneta pasa ahal izateko. Honek ondorio larriak ekar lezakeen kateatutako lagunen besoak apurtu ahal zirelako.

Herrian ordu bat t'erdi igaro ondoren, Poliziak herritik alde egin du.

Eguerdiko ordu batetan Foru Zaingoen helikopteroa agertu da eta, atzo bezela, Artozkiko erresistentziaren irudiak hartu ditu.

Itoizko Solidarioak Artozkira joateko deia egin du eta astebururako jardunaldi egitarau berezia prestatu du. Atzo herriaren egoera zabaltzeko prentsaurrekoa egin zuten. Hemen entzun dezakezu prentsaurrekoaren laburpena: euskeraz eta gazteleraz.

::: Seigarren eguna:::

(20/09/2003)

Gaur larunbata, hilak 20, erresistentzia eta autogestio 6.eguna bete da Artozkin, eta ekitaldi egitaraua iragarri bezala bete da.

Goizean, herriaren inguruak ezagutzeko mendi martxa burutu da. Bazkaldu ondoren, jaialdi haundia ospatu da Agoizko hainbat talderen eskutik: Erraldoiak, dantzariak, txistulariak, txalaparta, perkusioa eta herri kirolak.

Giro alaian ospatzen ari dira ekitaldi guztiak eta herriko biztanle aunitzek besta hau goxatu dutela eta erresisistentziari janaria ekarri diotela azpimarratu behar da. Oraindik ez dute sinisten ahal herria bizirik eta halako alaitasunez segitzen duela ,astelehenean joan zirenean gehiago ez zutela ikusiko uste bait zuten. 250 bat lagun ari da besta giroko ospakizun hauetan parte hartzen, herriko bizitzaren azken urte hauetako ekitaldirik jendetsuenak, zalantzarik gabe.

Biharko iragarrita ziren ekitaldiak honako hauek dira:
- Goizeko 11-etan: Pilota partidak.
- Eguerdiko 12-etan: Irati ibarreko geroari buruzko mahaingurua.
- Ondoren,kalderete txapelketa eta dastaketa arratsaldeko 3-etan.
Besta giroko ekitaldi hauek goxatzeko eta datorren asteko erresistentzia indartzeko deia egiten dugu.
_____________________________________________

Bestaldetik eta komunikabideetan azaldutako berriei dagokienez,Itoizko solidariook kontu hauek gezurtatu nahi ditugu:

- Foruzaingoaren esanetan, Iberdrolako langileen lana babestera joan ziren Artozkira,bezperan argindarraren mozteko lana galarazi genielako. Informazio hau guztiz gezurra da, Iberdrolako langileak egun hauetan Artozkira hurbildu ez direlako eta horregatik ezinezkoa da guk haien lana oztopatu izana.Egia den bakarra zera da: Foruzaingoak gezur hau baliatu duela aitzaki gisa herrian sartzeko, etxebarneak miatzeko eta kanporaketa saiakera bat egiteko, defentsa sistema nola eragiten zen ikusi ahal izateko.

- Oraingo arazoaren sakona ez da Foruzaingo eta Solidarioen arteko tirabirak.Arazoaren muina zera da: herriak botatzeko ez da inolako beharrik, oraindik ez bait dakigu ditxosozko urtegi hori beteko denentz,eta inoiz beteko balitz ere, guk dakigula, bete baino lehen herriak suntsitzen diren lehen kasua litzateke. Gure ustetan, herrien suntsipenaren atzetik Nafar Gobernu eta CHE delakoaren mendeku gose eta amorrazioa baino ez dira izkutatzen, urtegiaren aurka oposizioak erakutsi duen erresistentzia tinkoagatik.

- Gure taldea ez da Artozkiko okupazioa egiten ari,herriaren suntsipena eta urtegia betetzearen aurkako erresistentzia baizik.Gure nahikaria bakarra hauxe da:orain arte bezala, bertako biztanleek bertan bizi ahal izatearen eskubidea bermatzea.

::: bederatzigarren eguna :::

(2003-09-23)

FORUZAINGOA HIRUGARREN ALDIZ SARTU DA ARTOZKIN

Artozki herria defenditzeko bederatzigarren erresistentzia egunean, tentsio handiko orduak bizi izan ditugu, Foruzaingoa hirugarren aldiz sartu baita herrian. Goizeko 10.30ak aldera agertu dira, sarrera oztopatzen zuten bi auto eraman dituzte garabiaren laguntzaz, zenbait gauza txikitu eta ahal izan duten etxeetan sartu dira. Herrian pare bat ordu eman ondoren, 12.30ean aldegin dute foruzaine

Itoizko Solidarioak talde erne egon da goiz-goizetik, gau partean Guardia Zibialren mugimendu arraroak antzeman ditu eta.

Foruzaingoaren aurreneko furgoneta 10.30ak aldera iritisi da herriaren sarrera. Herrira ezin izan dira furgonetaz sartu, zubian zenbait auto eta harriak zudelako, barrikada moduan jarrita. Hori dela eta, oinez sartu dira herrian. Geroago bi auto erretiratu dituzte garabiarekin.

Herrian, foruzainen jarrera zeharo harroputza izan da. Ez dute Solidarioen bitartekariekin hitz egin nahi izan, eta jendeari ez diote mugitzen utzi. Horrez gainera, gitarra bat, informazio panelak eta atzo bulego moduan egokitu genuen txoko bat txikitu dituzte. Zabalik aurkitu dituzten etxeetan sartu dira (miatzeko, uste dugu: ezin dugu ziur jakin, ez baitigute hurbiltzen utzi), baina besteetan ezin izan dute.

Guztira hamaika foruzain zenbatu ditugu, zazpi herri barruan eta lau sarreran, zubiaren inguruan. Usoz aldean gehiago ikusi ditugu, antenatzar batekin, auskalo zer egiten.

Foruzainek orain arte egin diguten "bisita" luzeena izan da. Gainera, sekulako lanak hartu dituzte zubiko sarbidea "garbitzeko". Horrek alarma egoeran jarri gaitu, uste baikenuen polizia gehiago edota hondeamakinak sartzeko bidea irekitzen ari zirela. Zorionez, 12.30ean alde egin dute herritik.

Itoizko Solidarioak taldea pozik dago, bederatzi egun geroago, Artozkik zutik eta bizirik jarraitzen duelako. Hala ere, jakin badakigu erne segitu beharra dagoela, makinak edozein unetan ager daitezkeelako. Horregatik, dei egiten diogu jendeari Artozkira bil dadin.

::: hamaikagarren eguna :::

(2003-09-25)

ARTOZKI, ARTEZKI BIHURTZEKO BIDEAN

Gaur, erresitentziaren hamaikagarren egunean, Itoizko Solidarioek, Artozkiko bizilagunek eta Javier Martinez Gil Zaragozako Unibertsitateko Hidrogeología katedradunak prentsaurrekoa eskaini dute herriko pilotalekuan. Guardia Zibilak ere fin asko agertu dira hitzordura. Prentsaurrean, Artozki-Artezki egitasmoa aurkeztu dute Solidarioek.

Ekimen horren bitartez, Artozki herria "arte, sormen eta kritikarako topagune bizi" bihurtu nahi dute Solidarioek. Artisten erantzuna mundiala izan da: Zumeta margolariak, adibidez, margolan bat eskaini du dagoeneko, eta Fermin Muguruza kontzertu akustikoa ematekoa da heldu den igandean, Sorkun eta Kontrabandarekin (ikus astebururako egitaraua).

Solidarioek Artozkira bertaratzeko deia egin dute, behin berriro. Talde zein banakakoen laguntzaren premian daude erresistentziari eusteko. Esan dutenez, hainbestetan aldarrikatu izan dugun "bestelako mundu" horren hazia ereiten ari dira Artozki-Artezkin.

Oraingoz ez dago trabarik herrira iristeko, baina Foruzaingoaren eta Guardia Zibilaren jazarpenak ez dauka etenik. Gaur bertan, prentsaurrekoa hasi baino piska bat lehenago agertu dira guardia zibilak eta herritik paseoan ibili dira, patxada ederrean. Solidarioak aspaldiko lagunak bailiran agurtu dituzte, eta "hurrengo barbakoarako" gonbidapena espero dutela esan diete. Zeinen jatorrak. Prentsaurrekoan, herria "behartuta" utzi zutela berretsi dute Artozkiko bizilagunek.

Era berean, Itoizko urtegiaren kontra borrokatzeagatik Nafarroako Gobernuaren zigorra jasotzen ari direla salatu dute: ?Urtegi bat egiteko ez dago herriak eraitsi beharrik. Hemen, berriz, presa handia daukate etxe guztiak botatzeko, nahiz eta oraindik Estrasburgoko Auzitegiaren epaiaren eta betetze-proben esperoan egon?. Bizilagunek Solidarioen ?ausardia? txalotu eta esker ona adierazi diete.

Martinez Gil adituak, berriz, "lotsagarritzat" jo du Itoizko urtegia. Esan duenez, egitasmo erraldoi horrek ez dauka inolako justifikaziorik, ?zulo beltza? izango da Nafarroako ekonomiarentzat eta agerian utzi du bertago agintarien "harropuzkeria".

Arratsean, guardia zibil gehiago ibili da Lakabe eta Usotz herrien inguruan, Artozkitik gertu.

::: hamabigarren eguna :::

(2003-09-26)

Artozki arte, sormen eta kritikarako gune bizi bihurtzeko asmoa gero eta gorpuztuagoa ageri da,izaten ari den harrera ona dela eta. Artistek eta talde batzuk egindako eskeintzei esker asteburu honetako egitaraua unez unez haunditzera behartuak gara.

Gauzak horrela, 3 taldeko kontzertua izanen da datorren igandekoa: Arratsaldeko 6-etan Lakabe herriko Hurto-k joko du. 6,30-etan Desechos-en txanda izanen da (lehengo "Hechos contra el Decoro") eta 7-etan, iragarrita bezala, Fermin Muguruza-Sorkun eta Kontrabanda ariko dira modu akustikoan,"xume bezain goxo". (ikus astebururako egitaraua)

Bestaldetik, herriko elizan dagoen arte erakusketa artisten ekarpenei esker gero eta zabalagoa da. Orain arte,artista hauen lanak ikusgai daude: Zumeta, Dora Salazar,Beatriz de la Vega, Javier Campo Amoros, Koldo Arnaz, Ander Ormazuri, Iñigo Altolagirre, Keixeta, Barbara Stamuel, Unai Saez, Luis Morea eta Koldo Agarraberes margolarienak. Zizelkarien artean Anda Goikoetxea, Josetxo Crespo, Juan Gorriti, Iñaki Olazabal, Izotz Mendiburu eta Igor Obeso-ren lanak daude. Iolanda Markiaran eta Beatriz de la Vega-ren bideoproduzioak. Patxi Eugi eta Eulatek pilota eta ator bana utzi dituzte. Tafallako Txalaparta argitaletxeak ere 100 liburu eskeini ditu liburutegi zintzilikatua eratzeko.Gorka Torre idazleak liburu dedikatu bat utzi du eta Enrike Zelaia akordiolariak cd-bat ere.

Artezki sormen gune bizi eta dinamiko mantentzeko asmoa dugu. Horrenbestez, Asisko Urmeneta, Marko Aspach, Zaldi Eroa eta Wanker margolariek mehatxupean diren etxeetako hormetan euren irudimena isladatuko dute.Eskeintza artístiko eta donazioak etengabeak dira. Espero dezagun horrela segitzea eta sormen emariak Irati- ko ibaia gainezka dezan.

Iruñean sindikatuak eta herri erakundeak Artozkiren alde mugitzen hasi dira.Momentuz honako ekimena zehaztu da: astelehenetik ostegunera askari-konzentrazioa arratsaldeko 8-etan Sarasate pasealekuan, Diputazioaren aitzinean.

Gaur erresistentzia 12.garren egunean, Artozkin lasaitasuna izan da nagusi, polizia ageri ez delako.Itoizko Solidariook inoiz baina ozenago Artozkira joateko deia berresten dugu ibai,herri eta ibar biziz betetako beste mundu bat posible delako.Erresistentziak gogobeterik segitzen du baina segida eman behar zaio.Batez ere, astelehenetik goiti zure presentzia inoiz baino beharrezkoagoa da herri honen biziraupena bermatze aldera.

::: hamairugarren eguna :::

(2003-09-27)

ARTOZKI-ARTEZKI EKIMENARI HARRERA MUNDIALA

Erresistentziaren 13.garren egunean, Artozki-Artezki ekimena oso arrakastatsua izan da. Aurreko egunetan Artozki arte, sormen, eta kritikarako gune bizi bihurtzeko egindako deiak oso harrera ona izan du gaur, eta ekitaldi ezberdinekin jarraipena izan du. [Argazkiak]

Gaurko egun euritsua ez da oztoporik izan, adin guztietako jende asko asteburu pasa edo bisitan Artozkira hurbiltzeko, eta jai-giroan sarturik, gaurko programaturik zeuden ekitaldietan parte hartzeko ere. Beste aldetik, azpimarratzekoa izan da, aurreko egunetan ohiko agerpen polizial eta errepide kontrolak ez izatea.

Artisten ekarpenei esker herriko elizan ezarri ahal izan den arte erakusketak egunean zehar bisitari asko izan ditu.

Eguerdian margolari grafiko batzuek mehatxupean diren etxeetako hormetan "Artoski" deituriko mural batean euren irudimena islatu dute.

Arratsalde partean, "Oihulari Clown" taldearen antzezlanarekin parrez lehertuz disfrutatu ahal izan dugu.

Zaragozako talde baten ekimenari esker, etxeetako teilatuetatik zeruari begirako gasez puzturiko puxika sorta ezarri dute. Horrela, herriari kolorea emateaz gain, poliziak helikopteroz egindako bisitaldi ezatseginak ekidin eginen dira ere.

Gauerako, Cabaret talde baten saioa programaturik dago.

Biharko egitaraua (igandea 28):
- 18.00etan, Lakabeko Hurto taldeak joko du
- 18.30etan, Deshechos taldearen txanda izanen da (lehenengo Hechos contra el decoro)
- 19.00etan, Fermin Muguruza, Sorkun eta kontrabanda

Bukatzeko, Itoizko Solidarioen partetik, Artozkira joateko deia berresten dugu ibai,herri eta ibar biziz betetako beste mundu bat posible delako.Erresistentziak gogobeterik segitzen du baina segida eman behar zaio.Batez ere, astelehenetik goiti zure presentzia inoiz baino beharrezkoagoa da herri honen biziraupena bermatze aldera.

::: hamabosgarren eguna :::

(2003-09-29)

ARTOZKI-ARTEZKI ARRAKASTA IZUGARRIA

Gaur, astelehena 29, Erresistentzia hirugarren asteari hasera eman diogu Itoizko urtegiak heriotzaz mehatxaturiko Artozki herrian.

Asteburu hau oso arrakastatsua izan da. Egitaraua jarraikiz izan diren ekitaldietan 2.000 pertsonak baino gehiagok parte hartu dute

Asteburuko argazkiak: [1], [2], [3] ,[4], [5]

Artozki Artezki bilakatzeko asmoa artista aunitzen ekarpen eskuzabalei esker gauzatzen ari da, arte eskaintza gero eta zabalagoa eginaz. Herria bere osotasunean arte lan bihurtu da, eliza museo bilakatuta. Astean zehar bildutako artelan eta beste gauzei asteburu honetan bildutakoak gehitu behar zaie: Ana Mugeta, Karmele Arribe eta Faustino Aranzabal-en margolanak. Elke Izu, Aitor Mendizabal eta Maider Goikoetxea-ren eskulturak. Jabier Muguruza, Juan Luis Zabala, José Iriarte ?Bikila?, Luis Elberdin, Susa argitaletxea eta Ixaxkun-en komikiaren liburu dedikatuak. Gabi Garaialde, Iker Basterretxea eta Allende Arnaitz-en argazkiak. Javier Muguruza, Aitor Furundarena eta Hurto taldearen diska dedikatuak. Iker Pou eskalatzailearen katu oinak, Hurto? taldearen anpli eta platiloa?, C.D. Aoiz taldearen sinatutako baloia, Doneztebe-ko kros lehiaketaren garaikurra, etabar...

Herriaren autogestioak eguneroko funtzionamendu gisa harturik, aurrera darrai. Gaur hain zuzen ere, hamar ahuntz jaso ditugu, eta hurrengo egunetan oiloak espero ditugu.

Asteburu honetan, berehalako erresistentziarako herrira joateko brigaden eraketarako deia egin izan da.

Aste honetarako deialdiei dagokienez, astelehenetik ortzegunera arratsaldeko 8etan Sarasate Etorbidean diputazioaren aurrean eginen den askari-konzentrazioa nabarmentzen dugu. Deialdi hau arrazoi ezberdinengatik Artozkira joan ezin den jende ororentzako da.Gaur 25 pertsona elkartu dira bertan.

Itoizko solidariook alderdi politiko, sindikatu eta herri mugimenduei luzatutako deiari erantzunez, Komite internazionalistek asteazkenean egonaldi txanda egiteaz gain, Palestinako gaur egungo egoerari buruzko hitzaldia eskainiko dute. Halaber, ostegunean STEE-EILAS sindikatuak beste egonaldia eginen du, eta beste hitzaldi batean Irakaskuntza kalitatearen lege berriaren inguruko informazioa emanen dute ere. Irun eta Tolosatik datorren asteburuan Artozkira joateko autobus bat antolatzen ari dira.

::: hamaseigarren eguna :::
(2003-09-30)

ARTOZKI: ERRESISTENTZIA JARRAITZEN DU
13 pertsona atxilotutak

Itoizko zenbait solidario geratzen dira oraindik Artozkin. Horien erresistentziari esker, hondeamakinek ez dute herri osoa eraitsi: eliza, apezetxea, frontoia eta etxe gutxi batzuk gelditzen dira zutik. Foruzainek gas negarrazleak erabili dituzte, apezetxea hustutzeko ahaleginean, eta arrisku bizian jarri dituzte barruan mugitu ezinik dauden solidarioak. Nafarroako Gobernuko iturriek jakinarazi dutenez, ekintzaileetako bat Nafarroako Ospitalean dago, ?asma krisiak jota?.

Solidarioek behin eta berriro eskatu dute suhiltzeileen eskuhartzea, baina operazioaren arduradunak ukatu egin die laguntza. Polizi operazioa goizeko 5.00ak aldera hasi dira: Foruzaingoa mendi aldetik sartu da herrian, eta Guardia Zibilak kanpotik lagundu dio. Hasiera batean hamabost bat lagun kanporatu dituzte. Geroago beste hamabi atera dituzte, eta atxilotuta eraman. Horiek libre daude jadanik. Arratsaldean elizan ezkutaturik zegoen beste ekintzaile bat atxilotu dute.

Solidarioen bitartekariak gogoz kontra eraman dituzte Agoitzera, eta ez diete beren lana (arriskuez ohartaraztea) betetzen utzi. Prentsari ere ez diote arratsaldera arte sartzen utzi. Hori dela eta, foruzainak lekukorik gabe aritu dira.

Foruzaingoak portaera erasokorra erakutsi du, jendea miatuz eta mehatxuka. Zentsu hontan, Foruzaingoak gas negarrarazlea erabili du goizaldean hustu dituen etxeetatik jendea ateratzera behartzeko. Behin eta berriro, foruzainen axolagabekeria eta zuhurtzi eza salatu behar ditugu, Foruzaingoak ez baitzekien etxe horien jendea loturik edota kateaturik ote zegoen.

Guardia Zibilak zonalde osoan errepide eta pista kontrolak ezarri ditu. Eguerdiko hamabiak arte, zonaldera bertaratutako kazetariak Itoitz zenaren inguruan geldituak izan dira kontrol batean, Artozkitik 12 kilometrotara. Gainera, polizia indarrek Artozkitik gertu dagoen Usotz herrian antena handi bat ezarri dute; ba dirudi erresistentziaren komunikazioen kontrolarako erabiltzen ari direla.

Artozki herriko hustutzearen parte haundi bat oso goiz eta testigantzarik gabe gertatu da.

Arratsaldean, hainbat protesta ekintza izan dira. Agoitzen, Guardia Zibilak erabat hartu du merkatu plaza, eta ez diote jendeari han biltzen utzi. Herriko elkartean 120 lagun inguru elkartu dira, eta udaletxerantz abiatzea erabaki dute. Han Agoizko hainbat bizilagun daude itxita, protestan. Abiatu bezain laster, Guardia Zibila oldartu egin zaie manifestatzaileei eta hamar lagun atxilotu ditu. Euskal Telebistaren kamera bat ere izorratu dute. Zaragozan, elkartasun ekintza egin dute Ebroko Konfederazio Hidrografikoaren egoitzaren aurrean.

:: DEIALDIAK ::

- Agoitzen:
Egunero arratsaldeko 19:00-tan, protesta elgarretaratzea

- Zaragozan:

Arratsaldeko 19:30-tan, Ebroko Konfederazio Hidrografikoaren egoitzaren aurrean, Sagasta pasalekuan,protesta elgarretaratzea.

:: Beste Komunikabidearen Kronikak::

>>>gara.net:

• Solidarios resisten en un Artozki semiderruido
• Itoizko herriak suntsituta, egoera itzulezina egin nahi du Gobernuak

• Herri bat gutxiago

::: 17. eguna :::
(2003-10-01)

ERRESISTENTZI TINKO BATEN ONDOREN ARTOZKI ETA MUNIAINGO AZKENEKO SOLIDARIOAK KANPORATU DITUZTE,
BORROKAK AURRERA JARRAITZEN DU

Gaur, urriaren 1.an, erresistentzian 17 egun tinko igaro ondoren Artozki eta Muniainen zeuden solidarioak kanporatu dituzte.

Dakizuenez, atzo Nafar Gobernuak, bere izakera harroputza nabarmenduz, arratsaldeko bostetarako herriaren hustutzea iragarri zuen eta horretarako egunean zehar 10 kilometrotara baztertutako prentsa gonbidatu nahi zuen. Hau ezin izan zuten bete, gure kolektiboko kideek herriaren suntsiketa geldiarazten zutelako bere erresistentziaren bidez.

Gaur goizean Artozkiko apezetxean sei solidariok jarraitzen zuten erresistentziarekin.

Artozkik ezezik Muniainek ere protesta akzioak egon dira.

Hondeamakinak bere txikizio lanak goizeko bederatzietan hasi ditu. Excavaciones Perez del Rio izan da txikizioa egin duen entrepresa, Itoizko herrian bezala.

Gure kolektiboko bitartekariek berriz ere jasan dute poliziaren jazarpena; bere furgoneta miatuta izan da eta galdeketak jasan dituzte. Jazarpen hau Usozko antena zaintzen (eta solidarioen komunikazioak kontrolatzen) ari diren foruzainek egin dute.

Bitartean, Muniainen lau solidario teilatu batera igo dira eta eguerdiko hamabi t'erdiak aldera foruzainak hurbildu dira solidario hauek jeisteko asmoz. Solidarioak teilatutik jeitsi dituzte atxilotu gabe.

Muniain herria txikitzera zihoan hondeamakina bat geldiarazten saiatu diren bi pertsonak foruzaingoen motoristek atxilotu dituzte gaur arratsaldeko 3etan.

Arratsaldeko 5etan bigarren makina hau Muniain botatzen hasi da.

Bitartean Artozkiko etxeak botatzen jarraitzen zuten. Arratsaldeko 6etan eliza, apezetxea eta bi etxe baino ez ziren zutik gelditzen. Gaurko egunean zehar, uste baina zailtasun gehiagorekin foruzaingoak banan banan ateratzen aritu dira apezetxeko bi ganbera gotortuetan zeuden 6 pertsona. Hauek, hormetan zeuden tutu batzuen barruan, besoa kateatuta zuten.

Arratsaldeko 6etarako sei pertsona hauek ganberatik atera eta foruzaingoaren egoitzara eramanak izan dira.

Arratsaldeko 7ak aldera apezetxea eraitsia izan da.

Bestalde, atzo atxilotutako lagunen kopurua 18koa izan zen, haietariko 14 aske utzi zituzten eta lau gaua komisaldegian pasatu dute. Atxilotutako bi hospitalera eraman behar izan zituzten, asma krisis batengatik bat eta komisaldegira eramaten zutenean lepauztaian hartutako kolpe batengatik bestea. Atxilotuei erresistentzia, desobedientzia eta desordena publikoak leporatzen dizkiete.

Beste aldetik, Guardia Zibilak atzo arratsaldean lau pertsona atxilotu zituen Agoitzen, oldartze bortitzak egin ondotik. Lau hauek gaua komandantziaren egoitzan eman dute eta eguerdialdera Agoizko epaitegira eramanak izan dira deklaratzeko.

Bi egun hauetako errepresio balantzea (oraingoz): 30 atxilotu.
Irailaren 30ean: Foruzainek 18 eta G. Zibilak 4.
Urriaren 1an: Foruzainek 8.

Atzo hasita, auzokide talde batek Agoizko udaletxean itxialdia egiten ari dira Artozkin gertatu dena salatzeko. Gaur bertan jarraitzen dute eta badirudi luzerako dela.

::: 18. eguna :::
(2003-10-02)

ERRESISTENTZIAREN BALORAZIO POSITIBOA
PROTESTA EKINTZA AGOITZEN

Gaur, goizeko 11etan, Artozkin eta Muniainen egin diren erresistentzia 17 egun hauen balorazioa egiteko, Agoizko Udaletxearen aitzinean Itoizko Solidarioak prentsaurreko bat eskeini du. Bertan Artozkiko hainbat biztanle elkartu da euren eritzia jakitera emateko. Aldi berean datorren egunetako ekitaldien berri eman da.

Itoizko Solidarioek erresistentzia 17 egun hauek positiboki baloratzen ditu. Era duin eta zuzen batean erresistitzea lortu da, nahiz eta uda osoan zehar poliziaren kontrola nabaria izan Artozkiko herrian. Nafarroako gobernukoek behin eta berriro komunikatu triunfalistak atera dituzte, erresistentzia gaindituta zegoela esanez, baina Itoizko Solidarioek poliziaren erasoari bi egunez eutsi egin diote.[prentsaurreko osoa]

Artozkiko auzokideak bere herria sustsituta ikustean bere mina eta amorrua adierazteko prentsaurrekoan agertu dira, baita bere erabateko laguntza adierazteko Itoizko Solidarioen taldeari, garatu duten Artozkiko defentsa tinkoarengatik.

Artozki-Artezki ekimenari buruz bi proposamen berri kaleratu dituzte. Alde batetik, musiko batzuek konzentrazio bat antolatu dute: Diputazioaren aurrean egingo da bihar arratsaldeko 7,30tan. Beste aldetik, 8 historialari nafartarrek beren argitalpenak oparitzeaz gain, ekimenean parte hartuko dutela adierazi dute. Txalaparta eta Susa argitaletxeek deialdi honekin bat egin dute.

Agoizko Udaletxean itxita dauden Agoizko bizilagunek datorren iganderarte, bertan jarraituko dutela adierazi dute, hau da, eguerdiko ordu batean egingo den manifestazioa izan arte. Bizilagun hauek haraneko herrien suntsiketa salatzeko ekintza hau egiten ari dira, baita guardia zibilak kalean egiten ari den jazarpenak suposatzen duen askatasunaren murrizketagatik ere.

ITOITZEKIKO ELKARTASUN TALDEAREN PROTESTA EKINTZA AGOITZEN

Agoitzeko lau biztanle porlanezko 400 kiloko bi bidoien barruan kateatu dira, eta bertako udaletxe eta epaitegiaren arteko errepidea moztu dute. Protestaldi honen zergatia Nafar Gobernuaren jarrera suntsitzailea salatzea da, ez baitu inolako arazorik izan Itoitz bezalako urtegia eraikitzeko bailara oso bat desagertarazten, ekologia, gizarte eta arrazoiaren aurkako bada ere.

Eguerdiko 3ak aldera askatu dute kateatuta zeudenen arteko bigarrena, baina errepidea moztuta jarraitzen zuen eta euria hasi du. Ordu horretan, guardia zibil buruak bazkaltzera joan dira, kateatuak zeuden beste biak bi orduz han utzita euripean, kateak moztu besterik gelditzen ez zenean. Arratsaldeko 16,30ak baziren kateak moztu eta aske utzi dituztenerako. Orduan detenituak eraman dituzte. [Ekintzaren kronika osoa]

::: 2003-10-03 :::

ITOIZKO SOLIDARIOEN EKINTZA NAFARROAKO PARLAMENTUKO ATE NAGUSIAREN AURREAN

Gaur, hilak 3, goizeko 8-ak eta laurdenetan, lau Solidariok 400 kiloko bi hormigoiezko bidoietara euren besoak kateatu dituzte. Bidoi hauek Nafarroako Parlamentuko eraikin berriaren ate nagusiaren aurrean kokatuta dira, sarbidea erabat oztopatuz.

Bi ordu iraun duen ekintza honetan zehar Foruzaingoaren eta Polizi Nazionalaren jarrera (sekretak barne) oso bortitza izan da. Ekintza burutu duten pertsonekin batera propaganda banatzen zuen beste solidario bat atxilotu dute. Aipatzekoa da ere ekintza betetzen ari ziren kazetarien kontra mantendu duten jarrera bortitza.
[Ekintzaren kronika osoa]

Itoizko Solidarioek atzo Artozkiko erresistentzia egunen balorazio positiboa egin zuten.

Atzo,baita ere, Artozki-Artezki ekimenari buruz bi proposamen berri kaleratu zituzten. Alde batetik, musiko batzuek konzentrazio bat antolatu dute: Diputazioaren aurrean egingo da bihar arratsaldeko 7,30tan. Beste aldetik, 8 historialari nafartarrek beren argitalpenak oparitzeaz gain, ekimenean parte hartuko dutela adierazi dute. Txalaparta eta Susa argitaletxeek deialdi honekin bat egin dute.

Agoizko Udaletxean itxita dauden Agoizko bizilagunek datorren iganderarte, bertan jarraituko dutela adierazi zuten, hau da, eguerdiko ordu batean egingo den manifestazioa izan arte. Bizilagun hauek haraneko herrien suntsiketa salatzeko ekintza hau egiten ari dira, baita guardia zibilak kalean egiten ari den jazarpenak suposatzen duen askatasunaren murrizketagatik ere.

:: DEIALDIAK ::

- OSTIRALA

Iruñean
19:30tan musikarien elgarretaratzea Diputazioaren aurrean (Carlos III).

Donostian
19:00tan, Boulebarren elgarretaratzea eta gero manifestazioa. . (Kartela)

Bilbon
20:00tan Arriaga antzokiaren aurrean elgarretaratzea.(Deialdia)

- IGANDEA

Agoitz: 13:00tan MANIFESTAZIOA.

- Autobusak Bilbotik
- Autobusak Gipuzkoatik

:: Beste Komunikabideen Kronikak::

>>> gara.net:

• La Policía foral carga a las puertas del Parlamento de Nafarroa y detiene a cinco personas
• Cuatro solidarios se encadenan en Agoitz tras el derribo de Artozki
• Los detenidos denuncian que la Policía Foral «actuó con brutalidad»

• Nafarroako Parlamentuaren aurrean kateatutako lau 'solidarioak' atxilotu ditu Foruzaingoak
• Kolpeak, irainak eta mehatxuak

::: 2003-10-05 :::

HERRIAK BIZIRIK
BIHAR MANIFESTAZIOA AGOITZEN

Itoizko Solidarioek bihar Agoitzen HERRIAK BIZIRIK lelopean burutuko den manifestazioan parte hartzeko deialdia egin dute. Horrela Artozki eta Muniain herrien suntsipena eta Itoizko urtegiaren eraikuntza salatu nahi dituzte, baita ere Nafar Gobernuaren txikizioaren aldeko joera.

Artozkin izandako erresistentzia 17 egunez mantendu du Itoizko Solidarioak taldeak, herri honen suntsiketa oztopatzen. Egindakoa oso positibotzat baloratu du talde honek.

Poliziaren bortizkeria izan zen atzoko protestaldietako adierazgarriena, Foruzaigoak hainbat aldiz eraso bait zituen urtegiaren aurkako protesta egiten ari zirenak.

Goizean, Solidarioek Nafarroako Parlamentuko ate nagusiaren aurrean ekintza bat burutu zuten. Honen ondorioz bost lagun atxilotu zituen Foruzaingoak eta inguruan zegoen pertsonen kontra egin zuen karga. Aralar alderdiak Foruzaingoaren jarrera salatu zuen.

Eguerdiko ordu bi eta laurdenetan, Foruzainek Itoizko solidarioak eraso zituzten Beloson dagoen komisaldegiaren aurrean. Solidariak hara joan ziren goizean atxilotutako pertsonen zain eta han bertan jipoitu zieten barrutik ateratako polizi batzuk. Eraso honen ondorioz, pertsona bat hospitalera eraman izan behar zuten.

Iruñeko elgarretaratzean 200 lagun inguru elkartu ziren. Haiek inguratzen hainbat polizi (nazionalak) egon ziren.

Bilboko elgarrataratzea 150 lagun bildu zituen, kasu honetan arazorik gabe, poliziarik ez bait zen agertu.

Agoizko udaletxean itxita dauden Agoizko bizilagunek datorren iganderarte, bertan jarraituko dutela adierazi zuten, hau da, eguerdiko ordu batean egingo den manifestazioa izan arte. Bizilagun hauek haraneko herrien suntsiketa salatzeko ekintza hau egiten ari dira, baita guardia zibilak kalean egiten ari den jazarpenak suposatzen duen askatasunaren murrizketagatik ere.

:: DEIALDIAK ::

- IGANDEA

Agoitz: 13:00tan MANIFESTAZIOA.

- Autobusak Bilbotik
- Autobusak Gipuzkoatik

Homepage: http://

Artikulo hau PDF formatuan jaitsi
Artikuloa zerrendara gehitu
Artikulo zerrenda PDF formatuan jaitsi
E-mail bidez bidali
Zabaldun argitaratu
Iruzkina gehitu